العبث. دابا اش لاح وحدة خدامة فشركة مكلفة بالنقل تدخل للتيران وتحتافل مع الاسود. هاد نزهة ماهي من الصطاف ما هي من الجامعة و15 عام وهي كتحكم: اش لاحها تعنق حكيمي ولا تحتافل وسط التيران =تصاور=

 

 بعد ما ربحات الاسود الماتش الثاني فالمونديال القطري ضد بلجيكا بجوج لزيرو بانت سيدة مع الاسود. شي بنات كيخدمو على “النوع” عجبهم الحال وقالو واخيرا “العيالات فالصطاف ديال المنتخب”. من بعد شفناها معنقة حكيمي باش كان كيبكي. فاخر ماتش المغرب ضد كندا كانت فالصورة اللي تصور فيها عبد اللطيف الحموشي وياسين المنصوري وناصر بوريطة مع المنتخب ولعابتهم. طبعا هاد المناضلات من اجل قضايا المساواة ما عارفينش باللي هاد السيدة واسمها نزهة غضفة لا علاقة لها بالاسود. لا علاقة لها بالجامعة. لا علاقة لها بوزارة الرياضة اللي ولات مع التربية الوطنية فهاد الحكومة.

هاد السيدة هي خدامة فشركة “اس تور” ديال الصقلي اللي محتاكرين كلشي ديال المنتخبات فالنقل والاقامة… هادي سنوات طويلة.

هاد نزهة اللي فرحو بيها لمغاربة واعتابرو ظهورها شي حاجة ايجابية٬ راه العكس. ظهورها فضيحة كبيرة بزاف. دابا بلا ما نهدرو على علاش هاد الشركة بوحدها اللي شادة صفقة المنتخبات هادي سنوات دابا٬ نهدرو على صفتها باش تدخل للتيران. 

صفتها باش تلبس لباس المنتخب وتاخد بادج من الفيفا باسم المنتخب لوحدة خدامة فشركة وكتربح فلوس على هاد الخدمة.

اللي كيعرفها فالجامعة عارف قوتها كاع. اييه. هادي اللي عندها 15 عام تقريبا فالجامعة كتحكم. تقدر تجري على صطاف ولا تبدلو. 

هادي خدمتها الحقيقية هي تقلب على التراسبور. تقلب على الاقامة. كتسبق المنتخب شي شهر قبل باش تشرف علي كلشي. طبعا الحجز كيكون مدة طويلة قبل. ديما كتنسق مع العياشي فالجامعة.  هادي هي خدمتها. ماشي تصور مع رجالات الدولة. ماشي من المنتخب. ما عندها علاقة بيه.

حتى “كود” باش سولات عليها عدد من المسؤولين فالجامعة بانو خايفين منها. كيقولو وا بعدو منها. اييه هاد الشي عاشتو كود مع وحدة بلاصتها خاصها تكون فالشركة اللي كتربح لملايير مع المنتخبات كلها ماشي غير الفوت.

خدمتها تجيب طيارات خاصة للعابة فحالات معينة. هاد الشي علاش كتعنق واحد بحال حكيمي. 

ظهورها فضيحة. فضيحة كبيرة.